自殺式槓桿、正路槓桿、再槓桿
今日分享一下運用槓桿的經歷，錯的對的都有。
第一次錯了，是自殺式槓桿：那些年，一位同學暑期工做期貨經紀，我懵到上心口，問阿媽借兩萬蚊幫襯同學。當時我連股票都未玩過，只知恆指期貨每點五十蚊。第一日玩了一注，輸二十點，咁就一千，嚇到青都面埋。第二日，驚到完全無feel，當時有位大叔，撻住人字拖，賭神咁嘅樣，我見佢買升就即跟，撞彩贏四十幾點，即刻埋單計數，兩注合計贏千幾蚊，安心還錢畀阿媽。那晚越想越不對勁，第三日馬上取消戶口，攞返晒啲錢。
事後先知自己堅好彩，那年是87年，如果我唔知驚，10月股災肯定會令我好有成就：二十歲大學生學人破產！我零資本，以為頂多輸三幾千，根本唔知自己賭緊接近二十萬嘅投資（當年高位接近四千點，每點50蚊）！我嘅行為兩個字講晒：低能！這次經驗教識我三件事：（一）唔好問親戚朋友借錢投資（首期係畀嘅就唔同講法），輸了感情，有錢都補救唔到、（二）不要以輸贏論成敗（我87年贏錢！）、（三）未夠班唔好玩衍生工具。
第二次做槓桿，有波折但正路好多。1991年儲夠首期（我好彩，當年一成首期便可），決定買樓，第一次週末睇樓，心儀單位125萬，當日下大雨，無心情所以決定等等（投資睇心情，錯！）；一週後再睇132萬，條氣唔順又走了（投資鬥氣，錯！）；再一週後，有兩個差不多樓層坐向的單位，都係139萬，一間落訂有得睇樓，另一間落訂都無得睇，所以買第一間（香港買樓從來都係痴線）。更樣衰的是我連支票交收安排都唔識，搞到臨時訂金張支票被彈（只要夠無知，乜產品都會令你便乞兒），賣家要加到143萬，我含淚答應。不過收樓時個單位已升到180萬，我仲記得賣家個黑面樣！到1994年樓價升了一倍，因為槓桿，我的資本由十幾萬變成百幾萬。套了現，去澳洲讀我所愛（應用金融，講衍生工具和風險管理），並因所學得以入行。基於自己經歷，我深信很多事情都講運氣，以一世人幾十年整體量度，多數人的運氣相去不遠，希望年輕人能夠相信 Law of Serendipity, Lady Luck favours the one who tries。
第三次錯了，沒「再槓桿」：96-97年間買了兩個單位，都是自用，到2003年沙士低潮時，計過真係負資產：兩個單位加埋負資產百幾萬，儲蓄百零萬。當時家庭收入OK穩定，理論上可以透過按保借九成買多間，應供得起，但當時唔敢咁做。如果當時能客觀一點，把未來數十年的儲蓄能力視為資本，加上處於下行週期後段，我其實有能力再槓桿。
同一錯誤，到2009年沒有再犯：畢竟人工加了，認為可把握時機再槓桿；而且當時判斷宏觀形勢，認為零利率政策會持續很久，租金遠高於按揭利息成本，是難得一見的正收益，值博率甚高。
有必要再提醒上篇貼文所講嘅「唔怕負資產，最怕無子彈」，意指槓桿牽涉流動性風險。而買樓之所以可愛，是因為本地住房按揭貸款所牽涉的流動性風險較低，銀行主要看你的收入，就算樓價跌到負資產，只要準時供樓，銀行免得過都唔會搞你，讓你可以睇長線，坐到尾。但其他具槓桿的合約，好多時有補倉要求，補唔到就斬倉，無得留低就當然無長線投資可言。
對槓桿這個詞特別有 feel，因為十幾年前以普通話講學，提到如何「去槓桿」，覺得自己講得唔錯，點知午飯時同學紛紛走過來請教：「鄭高經，你講課時為什麼老是提到要『去公幹』呢？」我尷尬發現自己的普通話錯得離譜，還要同學們忍着淚 （因笑到標眼淚）教我如何發音，好讓我向其他同學更正。自此，我用普通話談槓桿總覺得很尷尬，寫就無問題。
鄭發
歡迎轉載，請註明出處 #貼地風管
Search